الأحد، 16 يناير 2011

25يناير



طبعاا منقدرش نحرم الشرطه من عيدهاا والا نكون جاحدين لدورهم الفعال في قتل وتعذيب وقمع حريتنا
طيب خلاص احنا لازم نحتفل بكل شرطي في اليوم ده ,وكمان لازم نحتفل بكل فاسد وحرامي وقاتل ونصاب
بس مش هنقولهم كل سنه وانتوا طيبين لان القتله  لا يستحقوا هذه العباره
وطبعا الجمع هنا مش لكل الشرطه لان في رجال شرطه تستحق الاحترام فعلا
لكن انا حددت كل فاسد ايا كانت مكانته او منصبه في البلد
شوفتوا تونس  رجاله وستات وشباب وبنات
نزلوا وطالبوا بحقوقهم ,وشوفتوا الرئيس اللي هرب من الخوف من شعبه
طب فاكرين انتوا يوم الانتخابات لما اتزورت ادام عيونا وسكتنا
فاكرين لما خالد سعيد اتقتل واللي لبس القضيه الناس الصغيره ومفيش حد من الكبار اتحاكم
فاكرين الشاب اللي انتحر لازمته  الماديه وغيره كتير مش عارفين يتجوزوا ,طيب فاكرين ميزانيه الشهر اللي مش مكفيه
طيب ازاي تنسوا واحنا في الهم كل يوم
طيب شايفين دموع عنيكوا المحبوسه وصرخة الغضب اللي بردوا محبوسه
انا عايزاكوا تفتكروا دي كويس وتنزلوا يوم 25 وتطلعوا كل اللي جواكوا
البلد دي بتاعنا احنا ,دي بلدنا واحنا اللي نقول مين يحكم ومين لأ ,لازم نطالب بعداله اجتماعيه
كفايه فقر وبلدنا مواردها كتير ,كفايه سرقه وفساد لصالح عدد صغير سارق حقنا
بلدنا مش بلد رجال اعمال ,بلدنا  بلد مواطن شقيان وتعبان طول السنه ,يلا نطالب بحقوقنا
خلينا نموت لهدف ,أنا مستعده أموت علشان أعيش حره ,ياترى مين مستعد معايا ؟

الجمعة، 14 يناير 2011

تحياتي شعب تونس



تحياتي لهذا الشعب الواعي الرائع
تحياتي لكل مواطن ادرك ما تحويه الوطنيه من حقوق وواجبات
تحياتي لكل تونسي وقف وقفة البطوله وطالب بحقه
تحياتي الكم جميعا شعب تونس

الثلاثاء، 4 يناير 2011

حاله2


معنوياتي منخفضه جدا بس باسباب منها:

1- روحي قررت الابتعاداو هكذا اظن وعلامات تعجب
2- احداث كنيسة القديسين وردود الفعل
3- دفعتي هتمتحن بكرة وانا مش معاها
4-المذاكرة وسخافتها 
5-احساسي بالوحده فالقريب بعيد وهذا اكثر الاسباب المؤلمه
6- مفتقده والدي جدا اشوفه على خير ان شاء الله 

السبت، 1 يناير 2011

اليوم ليس يوم الدين ,اليوم هو يوم الرب



احتفالا بالعام الجديد وفي صباح اول يوم 
ارادوا الاحتفال ولكن باسلوبهم الحقير 

هل تعشق نظرية الفوضي وتستخدمها منذ ميلادك؟
هل تجيد حقا استخدامها؟
اذا
هل تريد زعزعه الامن وضرب الوحدة؟
اعتدي على الفئه القليله
اضرب حرب طائفيه بين المتحدين
فرق الشمل 
شتت جموع البشر بالاخبار المذيفه
احرق خطوط الامل واجعل خط النار والثأر في قلوب الجميع
ادخل واستنكر ما فعلت 
اي بمعني "اقتل القتيل وامشي في جنازته" على رأي  مصري
"
تكونشي اسرائيل زعلانه يااولاد على الجاسوس ولا كرهها للمسيحيين قالوا يعكننوا عليهم مااهو هما اللي حملوا الرساله بعدهم بس ازاي دول هما والامريكان ايه قشطه على عسل ,ايوه تبقى هي القشطه والعسل "


هذا ما حدث اليوم ويحدث كل يوم ويوم بعد يوم بايدهم 
هم الذين لا يجهلهم أحد
"اصل الهبل موصلش اني اأذي جاري واخويا وحبيبي من سنين 
مش معقوله اعكنن عليه يوم عيده طيب مااهو انا لو عملت فيه حاجه هييجي يولع فيا ده احنا جيران
وبعدين هو انا لو مسلم وناوي اأذي اخويا المسيحي هأخده اخ اصلا ليه ولا هشتغل معاه وهحبه ازاي يعني 
اصل الموضوع مش ناقص تخلف وغباء لا ع المسا ولا الصبح 
وبعدين مااحنا طول عمرنا بخير وكويسين اشمعنا دلوقتي يعني طأت ف نفوخ المسلم يعككن على المسيحي"


حقا نحن الجموع المشتته ولكن حان وقت الابتعاد ورسم الحالة من بعيد
حان وقت الاتحاد ردا على كل هذه التهديدات الواضحه باننا "المستهدفين" الضعفاء
حان وقت القوه 
فلندافع عن كرامتنا كمواطنين  وعن كرامة الوطن باسم الرب 
فاليوم ليس يوم الدين ,اليوم هو يوم الرب