كواليس الثورة

هو أنتي بقى مع مين

بصوا بقى أنا من البداية موقفي واضح وصريح اني مع الثورة

بس مسمعش حد بيشتم او يعيب بسوء خلق وقلة وعي واسكتله

طيب ما هما سارقنا وناهبنا : اه يسرقونا بس احنا احسن منهم نشتم ليه

وبعدين ايه حكايه ضد ومع اللي تفشت ف بين الشباب دي ,انت مش معايا تبقى ضدي

طب ازاي يا خلق الله ده احنا كلنا هدفنا واحد ,نعادي بعد ليه

ده الاتحاد قوة والتفرقه ضعف

بصوا باختصار زي ما بندافع عن الحريه والديموقراطيه لازم نحترم حرية بعض واراء بعض

خلونا منضحكش اللي قال اننا شباب لا يصلح للديموقراطيه فينا وخلونا أحسن وانضف

نقطه كمان استفزتني جدا جدا ,يعني ايه اشوف ناس بتغني لمصر وصوتهم مش عاجبني اقعد اتريق واضحك غيري عليهم

على فكرة كده عيب ,دول مصريين بيعبروا عن حبهم للبلد يمكن هما شايفين صوتهم حلو ,دي حريتهم الشخصيه واللي مش عاجبوا ميسمعش

ونقطه كمان :الناس اللي مبتعجبهاش صفحات تعملها ريبورت علشان تتحذف ,قمة الديكتاتورية اللاخلاقيه

احنا غلبنا امن الدوله ومباحث الانترنت ف التعسف والتعدي على الحريات

يا مصريين يا شباب مصر الشرفاء اتقوا الله ف الحريات والديموقراطيه ولا تظلموا غيركم وكونوا منصفين ...

فلتسعدي يا مصر

ولأول مرة تبتعد خطواتنا عن نسيج الخيال...لترتقي بنا الى أرض الواقع

إنتصرنا وتعالت هتافات النصر
إنتصرنا وارتقينا بأمنا مصر
إنتصرنا يا حبيبتي الاولى والاخيرة
انتصرنا وأخرجنا الفساد من القصر
فلتسعدي يا مصر

انكشح يا ريس ,خنقتني

عارفين بعد خطاب الريس الاخير,الواحد قال خلاص بقى نلجأ للحوار مؤقتا وندعو للتهدئه ما هي دي مطالبنا من الأول وخلاص على اعتاب تحقيقها ...بس دلوقتي بجد انا اتخنقت منه,انا بحترمه جدا كشخصيه عسكريه وكنت هحترمه اكتر لو كان حاكم عادل,بس خلاص كفايه بقى
ده المثل بيقول انا واخويا على ابن عمي وانا وابن عمي على الغريب
ليه يا ريس قتلت اخواتي ولا هو الشعب غريب ...طيب مين اخوك ومين ابن عمك
ازاي دافعت عن الارض دي وكنت اهم عوامل انتصارنا ف اكتوبر علشان مؤمن بالحرية؟
ودلوقتي بتقتل ولادنا لانهم بيطالبوا بحريتهم ... الكلام كتير والحيره اكبر
بس اللي ممكن اقوله ان لو في مؤامره او فتنه فهي وليده من نظامك انت
,من اللي اشتريتهم وبعتنا كلنا ,صدقني مش هننسى مبارك بطل 73
بس بردو اوعدك اننا مش هننسى مبارك اللي حكم مصر 30 سنه بأمن الدوله والاعتقالات
ارحل علشان نأخد فرصتنا ف تحقيق الحرية

دعونا نحكم صوت العقل

من أجل مصر ,وطننا الذي نسعى من أجله ...مصر التي خرجنا في المظاهرات ندعو بإسقاط  نظام  لأنه أكثر فيها الفساد وأضاع حقوق شعبها...من أجل مستقبل أفضل نطمح جميعا في الوصول إليه ..دعونا نحكم صوت العقل
دعونا نضع أهدافنا صوب اعيننا ونرى كم منها لاقى إستجابه للتحقيق ,أبعدوا عن أعينكم أي عداوة شخصية لشخص مبارك
فشخصه لذاته أما سياساته لنا جميعا ,وهذا الرجل في طريقه إلى إصلاح سياساته ....دعونا نرى هذا الاصلاح وإن لم يتم فموعدنا لن ينتهي والميدان لن يرحل...كنت ممن نادى بإسقاط النظام وها هي حكومة جديدة تدعونا إلى الحوار لتحقيق المطالب ...ماذا نريد غير تحقيق مطالبنا ,هذا هو هدفنا الاول فلا تتخلو عن هدفكم الاول ولا تجعلوا من حماسة الشباب سيف نقطع به رقاب كل المصريين
أترجاكم وأنا منكم  ,نزلت في المظاهرات وتاذيت في بيتي وفي الشارع وشعرت لأول مرة في حياتي  بالخوف من الغد ,فكروا وحكموا عقولكم وضعوا هدفنا الأول وهو تحقيق المطالب وتغلبوا على العند الذي لا يأتي سوا بالمصائب ,أترجاكم

25يناير

طبعاا منقدرش نحرم الشرطه من عيدهاا والا نكون جاحدين لدورهم الفعال في قتل وتعذيب وقمع حريتنا

طيب خلاص احنا لازم نحتفل بكل شرطي في اليوم ده ,وكمان لازم نحتفل بكل فاسد وحرامي وقاتل ونصاب

بس مش هنقولهم كل سنه وانتوا طيبين لان القتله  لا يستحقوا هذه العباره

وطبعا الجمع هنا مش لكل الشرطه لان في رجال شرطه تستحق الاحترام فعلا

لكن انا حددت كل فاسد ايا كانت مكانته او منصبه في البلد

شوفتوا تونس  رجاله وستات وشباب وبنات

نزلوا وطالبوا بحقوقهم ,وشوفتوا الرئيس اللي هرب من الخوف من شعبه

طب فاكرين انتوا يوم الانتخابات لما اتزورت ادام عيونا وسكتنا

فاكرين لما خالد سعيد اتقتل واللي لبس القضيه الناس الصغيره ومفيش حد من الكبار اتحاكم

فاكرين الشاب اللي انتحر لازمته  الماديه وغيره كتير مش عارفين يتجوزوا ,طيب فاكرين ميزانيه الشهر اللي مش مكفيه

طيب ازاي تنسوا واحنا في الهم كل يوم

طيب شايفين دموع عنيكوا المحبوسه وصرخة الغضب اللي بردوا محبوسه

انا عايزاكوا تفتكروا دي كويس وتنزلوا يوم 25 وتطلعوا كل اللي جواكوا

البلد دي بتاعنا احنا ,دي بلدنا واحنا اللي نقول مين يحكم ومين لأ ,لازم نطالب بعداله اجتماعيه

كفايه فقر وبلدنا مواردها كتير ,كفايه سرقه وفساد لصالح عدد صغير سارق حقنا

بلدنا مش بلد رجال اعمال ,بلدنا  بلد مواطن شقيان وتعبان طول السنه ,يلا نطالب بحقوقنا

خلينا نموت لهدف ,أنا مستعده أموت علشان أعيش حره ,ياترى مين مستعد معايا ؟

تحياتي شعب تونس

تحياتي لهذا الشعب الواعي الرائع

تحياتي لكل مواطن ادرك ما تحويه الوطنيه من حقوق وواجبات

تحياتي لكل تونسي وقف وقفة البطوله وطالب بحقه

تحياتي الكم جميعا شعب تونس

حاله2

معنوياتي منخفضه جدا بس باسباب منها:

1- روحي قررت الابتعاداو هكذا اظن وعلامات تعجب

2- احداث كنيسة القديسين وردود الفعل

3- دفعتي هتمتحن بكرة وانا مش معاها

4-المذاكرة وسخافتها 

5-احساسي بالوحده فالقريب بعيد وهذا اكثر الاسباب المؤلمه

6- مفتقده والدي جدا اشوفه على خير ان شاء الله