الجمعة، 23 أبريل 2010

//تعظيم سلام //


-1-


من قلبي اقول تعظيم سلام
للرياسه والنظام
من قلبي اوطى وانحني
ولو همسح كعب المدام
ودا مش كلام

من قلبي اعمل معجزات
للسياده واللي جاي واللي فات
وانفي ملامح محنتي
واولادي من الجوع للممات
نرفع شعار هس وسكات

***


هس هس بتقولوا ليه 
سرقه ونصب و تقليب ايه
لا مايصحش اوعى يا بيه
دي حكومتي ست الستات


لا متقولش وروح لبعيد
يقبضوا ليه ع عز حديد
بتقول سوده وفيها تشديد
هاتلي يا مرسي قهوتي هات
***


كيك كيك ع الوزرات
وكروش مليانه وحسابات
وندور ليه ف الدوسيهات
دي رشاوي وفلوس معونات

كيك كيك ع البهوات
دي فلوس الدعم يا بشوات
استثمار ايه وموبيلات
فين هي فلوس المعاشات 

***
سيب الراديو يا مرسي سيب
حتى الجاهل بقى بيعيب
يصرخ فينا يقول كداب
شكله كدا مليان الجيب


حتى الغدر ف بلدي نصيب
ييجي الظالم كدا ويصيب
هس ازاي .. واسكتوا ليه
دي عصابه كبيره وتهليب
***


مش راح اسكت بعد اليوم
راح امحي بكلامي غيوم
راح اعلم ابني الحريه
قوم ياابني متبقاش مصدوم

قوم نمحي ونشيل ف هموم
ونزيلها من وطني سموم
دي حكومه خسيسه ومرشيه
قوم يلا نتكلم قوم
يلا يا مصري انت وهي


***

2-


ريسنا يا ملك الوطنيه
بتقول دا شعارنا الحريه
ليه تهجم بقى ع الاحزاب
ولا  دي  كوسه ع ملوخيه


فينك يا سياسه يا خارجيه
ولا ندور ع الداخليه
ولا بلاش لحبيب يزعل
اصلوا وارثها من البشويه


ونقول فينك يا التعليم
يا ثقافه وعلم وتنظيم
يعمل ايه دكتور الجامعه
ولا حرنكش ع برسيم


وندقق بقى ف الزراعيه
والجاز والخطب العفويه
ويبوظوا ف الارض الطين
اصله عاوزها طريق دوليه


وحكومه نزيهه ووطنيه
المسؤل يااخد السنويه
ويقول قدمت التقرير
واولادي من صفر لميه
اصل مراتي ابوها وزير


والاعلام بقى حاله تمام
واهو كله شغال ف كلام
اللي يقول اخترناه
واللي يغني عليه يا سلام


كتر خير محو الاميه
ف حكومه الحزب الوطنيه
الاوراق كامله وممضيه 
والانجاز وصلوا لسعديه



*******


-3-



يلا نغني سوا يا حمار
ياوارثنا وكانه حصار
راح نخلص منك بالقوه
احنا اللي لا حول ولا قوه
اصلنا هنا  بلد  الاحرار


ومتنساش 6 ابريل
يومك فيه راح يبقى طويل
هنطالب تغيير دستورك
مش هنخافك مش هنميل
مش راح نبقى حمير يا جميل


قالوا  الحكم راح تنساه
وانت يا ببس تجري وراه
ابنك مين ...شمال ويمين
مش شايف غير خيبه وجاه



قالوا الحكم ف ايدك زور
تجري تلف وراه وتدور
تعزف اه وورااها  اه
وتروح كدا المانيا تزور


شد لحافك  ولا بلاش
ليبان شيبك تبقى معاش
خليك متولع ف لهيبك
ونفاقك ومنستغناش 

********

bs kda :D 


الاثنين، 19 أبريل 2010

السياسه> ..حق مشروع>


ماما انا نازله مش عاوزه حاجه

رايحه فين 
 ؟! 

هروح اعمل استماره عضويه في حزب الغد


نعم ؟!....ليه؟؟!

علشان لازم يكون ليه كيان سياسي في البلد دي..لازم اشارك واقول صوتي ...لازم اكون ايجابيه مش معقوله نعيش حياتنا كلها في السلبيه المنتشره دي

خليكي جنب الحيط يا بنتي احسن ومتعمللناش مشاكل ....الحاجات دي لو فيها نفع كان ناس كتير اثروا قبل كده...انما كها ضرر ومش هيبقى ليكي لوحدك...دا لينا كلنا ..

من امتى وانا بخاف يعني ؟!.... وبعدان انتي عارفه اني مختلفه بدماغي وتفكيري ..ليه ممكن تمنعيني من حق مشروع ,دلوقتي
انا من حقي اشارك واكون فعاله  ...لازم يكون ليا دور واعرف اعمل حاجه علشان البلد دي 
عاجبك الفساد والتحطيم والبلاوي اللي احنا فيها دي ؟!
ادعي  بس انتي علشان صوتنا يأثر

طول عمر دماغك غلط وهتودي نفسك وتودينا في داهيه

المهم مليت الاستماره والتليفون  مبيبطلش رن

اروح البيت الاقي كميه اتصالات رهيبه من والدي ..والدي بقى مختلف بتوجيهه..يعني بيوجهه بصوره مختلفه 

بيحب يستخدم المنطق في الاقناع علشان اكون داخليا مقتنعه مش بس بتأثر بكلامه

قعد يتكلم معايا على ايمن نور وقضيته وانفصاله عن جميله اسماعيل 

وانه مش جدير بانه يكون مثل اعلى وكدا 


المهم سمعت الكلمتين ورديت عليه رد مهذب ...


يا والدي لو ايمن نور ميستاهلش مصر تستاهل مني المحاوله

بلدي تيستاهل اني اجرب ...ومش معنى عضويتي دي ان لو حد افضل للبلد هقف ضده بالعكس ....البلد دي محتاجه تعاون مش صراعات والمصلحه العامه فوق كل شئ

كان حق مشروع ان يكون ليا نشاط سياسي

يمكن لسه مجتليش الفرصه المناسبه ...ويمكن لسه مااشتركتش بجديه ع ارض الواقع

بس بجد بتمنى

لان بلدنا بتحتضر ومحتاجه ولادها يسعفوها 

وانا عمري ما هخذل بلدي لاخر نفس في عمري 

واعتقد انه حق مشروع 


الجمعة، 16 أبريل 2010

كلهن مثلها



ترن ترن

انا ::الو 

هي::ازيك يا غاده

انا ::ازيك يا حبيبتي وحشتيني ..عامله ايه ف المذاكره؟

هي ::باركيلي انا هتجوز

انا :: تتجوزي ؟؟ ازاي ..انتي مكملتيش 16 سنه

هي ::شوفتي بقى خمسه وخميسه ف عين الناس  والله خايف من الحسد

انا ::حسد !!.. قوليلي تتجوزي مين بقى

هي ::ابن صاحب بابا من زمان وعسول خابص وكمان  عنده شقه وجابلي شبكه ب 30 الف جنيه

انا ::اه يعني تعرفيه بقى من زمان وكدا

هي ::لا يا بنتي اعرفه منين دا لس متقدملي من يومين  بس وافقنا على طول

انا ::وافقتي بقى ع اساس ايه ...

هي ::بابا قالي هيعرف يفتح بيت وهعيش مرتاجه ومبسوطه وهيجيبلي كل اللي عاوزاه

انا :: اه ودا عند كام سنه بقى ان شاء الله

هي ::عنده 25 بس تشوفيه تقوي اصغر مني

انا :: 25!! طيب بس فكري كويس

هي ::متعمليش زي الناس اللي حاقد عليا كدا كل ما حد يشوفني فيهم يقولي فكري كويس

انا ::حقوده

هي ::معلش بقى مضطره اقفل ..حبيبي بيتصل

انا ::حبيبك !!!,, اتفضلي

اسمع صوت نشره الاخبار

اذهب مسرعه كي اعرف الجديد

ويأتي الخبر الساحق:: وهو ان تعليم الفتيات ومحمو الجل من السيدات قد بلغ زروته

اتعجب..اتألم

اين هو التعليم....كلهن لا يسعن الا الى الزواج..حتى امي المتعلمه والمربيه للاجيال  تريد ذلك لي ايضا

اوليس هذا جهلا !!

اعتقادي الداخلي ان نشأه الفتيات في وطننا بدأت تنحدر اخلاقيا وفكريا 

تحديد الرغبات الماديه والزوجيه والحياتيه اصبح اكثر تدنيا و جهلا

كيف ازوج ابنتي التي لم تحصل على الثانويه العامه  كيف القي بها في مستقبل غامض

بدون شهاده ووظيفه وكيان وشخصيه

ازدادت حالات الطلاق ...واذداد الحب الاصطناعي ..والحب الزواجي

والحب الاصطناعي والزواجي لا يختلفوا كثيرا ف المعنى ...فمعناهم هو حب الشخص للزواج 

منه او لانه الذي تقدم لخطبتي فيجب ان احبه كامر مفروض 

لا استطيع استيعاب  كيف تفكر الفتيات المتعلمات ف الزواج

انه ليس مرح ولا فرح

انه مستقبل غامض يجب التفكير جيدا فيه والوقوف ع ارض صلبه قبل خوض هذه التجربه

يجب ان احدد اهدافي وشخصيتي..فالزواج ليس اخر العمر ولا اهم ما يحيط بنا

واذا كالن حلم للبعض فيجب التخطيط الجيد  والاتزان ف التفكير والوعي حتى يتحقق 


انا لا افكر هكذا  ف مستقبلي ..ولا يشتتني  الا اراء من احبهم حولي 

احبهم واقدرهم ولكني لن اسير الا بهذه الرأس وهذه الشخصيه

ولن اكون مثلهن فكلهن مثلهاا