أقرأوها بالصعيدي :D
"ما أخذ بالقوه لا يسترد إلا بالقوه"
قومي يا خاله
قومي يا خاله ولادنا أحرار
مش شعب هفيه وفرار
لينا الحق في ارض عيالنا
لولا الدم ما مات التار
فاكره يا خاله
فاكره ولدنا
لما اتعلم ضرب النار
كان صلب ويهد جدار
فاكره يا خاله حريم الدار
لما استقووا وقتلوا العار
كانوا يعلوا الصوت والهمه
مش دلوقتي
صبحوا ركوبه لاي حمار
فاكره يا خاله اخويا محمد
وسط العاركه كان طيار
ضرب الضربه الاولى بقوه
شد رجاله وكان جبار
دلوقتي شدته على ناسه
مش يختشي مره لاحساسه
يلعن ابو طمع الثوار
فاكره يا خاله
كيف اولادنا كانوا رجاله
وقفوا سدود عكس التيار
حفظونا وصانوا الاسرار
مش دلوقتي صبحوا عواله
ع القهوه يقضوها قواله
يلعن أبو جبن الرجاله
اللي يهد اسود من فار
فاكره يا خاله
لما ولدنا اتعين ظابط
يحمي ويتعلم ويرابط
صبح الصبح غول مصعور
يذبح امه يحبس عمه
يقتل اخوه
ضرب الذمه عرض الحائط
قومي يا خاله
قومي يا خاله وزيدي النور
همي نكسر سوا في السور
همي نعلي الصوت والهمه
انا وطني مش واد مكسور
قومي يا خاله من دي قبور
قولي الحق وامحي الزور
فكري ابنك بالرجاله
قوي ايمانه ,قومي يا خاله
ولا اقولك ,نامي يا خاله
نامي يا خاله وطفي النور
بقلمي:غاده أشرف
0 التعليقات:
إرسال تعليق